La Morte solitaria sul balcone
* * *
Morte de un colombo triestin
di Manlio Visintini - (2008)
Su de un pergolo del vecio Lloyd
a mezanote,
...vardo 'na maciona scura
ferma come el mar in Sacheta
senza Bora.
Ogni tanto, pian pianin,
slonga el colisin verso via Cadorna
forsi scolta i muli ciacolar monade
tra conzerti de biceri...
Improviso refolo
ghe dismissia le piume
de la panza,
el xe a schenada
serado drento le sue ale,
con le zate ingropade verso Dio.
E quel zercar coi oci atorno
...forsi, vol saludar
i sui fradei imbusadi
...che spava sora i cornisoni,
indove su le finestre
se specia mile stele...
De colpo el se ferma,
restando cussì
con la dignità de un faraon,
e mi che son con lu
anche se no go le ale,
squasi zerco de compagnarlo
...in Paradiso.
_____
(Omaggio all’Ing. Gianni Bartoli - storico Sindaco di Trieste)
Nessun commento:
Posta un commento